Milli Müqavimət Cəbhəsi bəyanat yaydı: “O başlar əmmamələrlə birlikdə ayaq altına atılacaq”

Bu barədə  Azərbaycan Starateji Araşdırmalar Mərkəzinin İnformasiya xidmətindən məlumat verilib.

AMMC-ın yaydığı bəyanatda rejimə bağlı, sapı özümüzdən olan baltalara son xəbərdarlıq çağırışı edilib.

 Yayılan çağırışda deyilir:

“Təbrizdə öldürülən Aylar Həqqinin intiqamı mütləq alınacaq. Güney gəncləri tökülən qanların intiqamını alacaq və rejimə bağlı olan heç kəs artıq güvəndə olmayacaq. Əgər dünənə qədər molla əmmaməsi ayaq altına atılırdısa, bu cinayətlər durdurulmasa və millətimizin etirazlarına qatilcəsinə cavab veriləcəksə, o başlar əmmamələrlə birlikdə ayaq altına atılacaq. Bu səsi rejimə bağlı qatillər eşitsinlər və rejimə bağlı heç kim rahat yatmasın”.

 Güney gəncliyi xəbərdarlıq edərək əlavə edib:

“Əlləri qana batmayanlar millətin yanına gəlsin.  Nə qədər gec deyil, özünüzü və ailənizi xilas edin. Qan tökməyi düşünən hər kəs bilməlidir ki, onlar mütləq millətin önündə cavab verəcəklər”.

Qeyd edək ki, Təbrizdə etirazlar zamanı Tibb Elmləri Universitetinin tələbəsi Aylar Həqqi öldürülüb. o, hökumət qüvvələrinin nümayişçilərə qarşı zorakılığı və güc tətbiq etməsindən sonra binalardan birinə sığınıb.

Etirazçıları təqib edən bir neçə xüsusi təyinatlı onun ardınca binaya girib və Aylar Həqqini oradan aşağı atıb. Ağır bədən xəsarətləri alan gənc qız hadisə yerindəcə həyatını itirib.

Əslən Şərqi Azərbaycan əyalətinin Məlik (Məlikan) kəndindən olan tələbənin dəfn edilmək üçün doğma kəndinə aparılmasına icazə verilməyib.
Aylar Həqqinin ailəsi və rabitə idarəsində çalışan atasına dəfn mərasiminin səssiz keçirilməsi və ictimailəşdirilməməsi üçün təzyiq edilib.
Qeyd edək ki, etirazlar başlayandan noyabr ayının 16-dək İranda öldürülənlərin sayı 362 nəfərə çatıb.