Hər xalqın tarixində elə bir zaman yetişir ki, artıq hadisələrin arxasınca getmək deyil, hadisələrin istiqamətini müəyyənləşdirmək lazım gəlir. Azərbaycan son illərdə məhz belə bir mərhələyə yüksəlib. Ölkənin siyasi iradəsi, iqtisadi imkanları, hərbi qüdrəti və beynəlxalq mövqeyi bir məqsəd ətrafında birləşib: Azərbaycanın taleyi yalnız Azərbaycan xalqının iradəsi ilə müəyyən olunmalıdır. Prezident İlham Əliyevin rəhbərliyi altında həyata keçirilən dövlət siyasətinin əsas mahiyyətini də bu prinsipdə görmək mümkündür.
İlham Əliyevin prezidentliyi Azərbaycanın özünəinamının gücləndiyi bir dövr kimi xarakterizə olunur. Dövlətin qarşısında duran məsələlərə kənardan həll gözləmək əvəzinə, milli imkanların səfərbər edilməsi və uzunmüddətli strategiyanın qurulması əsas xəttə çevrilib. İqtisadi gücün artırılması, ordunun müasirləşdirilməsi, beynəlxalq əlaqələrin genişləndirilməsi və ölkənin enerji imkanlarının strateji üstünlüyə çevrilməsi Azərbaycanın müstəqil qərarvermə imkanlarını daha da möhkəmləndirib.
Bu siyasi kursun tarixi sınağı isə Qarabağ məsələsində yaşandı. Onilliklər ərzində Azərbaycanın qarşısında dayanan ən böyük milli problem Prezident, Müzəffər Ali Baş Komandan İlham Əliyevin rəhbərliyi altında Azərbaycan Ordusunun qazandığı tarixi Qələbə ilə yeni mərhələyə qədəm qoydu. Azərbaycan əsgərinin döyüş meydanında göstərdiyi qəhrəmanlıq xalqımızın milli iradəsini bütün dünyaya nümayiş etdirdi. Ərazi bütövlüyünün bərpası və sonrakı mərhələdə ölkənin bütün ərazisində suverenliyin təmin edilməsi müasir dövlətçilik tariximizin ən mühüm hadisələrindən oldu.
Qələbənin ən böyük mənəvi ünvanlarından biri Şuşadır. Azərbaycan insanının yaddaşında Şuşa yalnız bir şəhər deyil, milli mədəniyyətin, tarixi yaddaşın və Qarabağa bağlılığın simvoludur. Şuşada Azərbaycan bayrağının yenidən dalğalanması bütöv bir xalqın uzun illər qəlbində yaşatdığı arzusunun gerçəkləşməsi idi. Bu gün həmin torpaqlarda keçirilən tədbirlər, bərpa olunan tarixi abidələr və yenidən canlanan həyat Azərbaycanın öz milli-mədəni irsinə qayıdışının da göstəricisidir.
Tarixi Zəfərin arxasında isə adlarını Azərbaycan xalqının əbədi ehtiramla çəkəcəyi şəhidlərimiz və qazilərimiz dayanır. Vətən uğrunda canından keçən qəhrəmanların ailələrinin qayğı ilə əhatə olunması, qazilərin sağlamlığına, reabilitasiyasına və sosial təminatına diqqət göstərilməsi dövlətin mənəvi məsuliyyətidir. Şəhid ailələrinə göstərilən hər bir qayğı, qaziyə uzadılan hər bir dəstək Azərbaycanın öz qəhrəmanlarına sədaqətinin ifadəsidir. Çünki bu gün azad torpaqlarda qurulan həyatın təməlində onların fədakarlığı vardır.
Qələbədən sonra Qarabağda başlayan proses isə Azərbaycanın başqa bir gücünü – qurmaq və yaratmaq bacarığını nümayiş etdirir. Ağdam, Füzuli, Laçın, Zəngilan, Cəbrayıl, Kəlbəcər və digər ərazilərdə həyata keçirilən genişmiqyaslı layihələr təkcə dağıdılmış infrastrukturu bərpa etmək məqsədi daşımır. Burada müasir şəhərlər və kəndlər formalaşdırılır, yeni iqtisadi imkanların yaradılması üçün təməl qoyulur. Azərbaycan azad etdiyi torpaqlara keçmişin görüntüsünü deyil, gələcəyin həyatını gətirməyə çalışır.
Böyük Qayıdışın başlaması bu siyasətin insan talelərində görünən nəticəsidir. Uzun illər doğma yurdlarından uzaqda yaşayan ailələrin öz torpaqlarına dönməsi, yeni evlərinin qapısını açması, uşaqların Qarabağ məktəblərində təhsil alması böyük tarixi prosesin canlı mənzərəsidir. İllərlə xəritədə işğal altında göstərilən şəhər və kəndlər bu gün yenidən yaşayan Azərbaycan məkanına çevrilir. Bu, dövlətçilik tarixində yalnız siyasi deyil, böyük mənəvi qayıdışdır.
Prezident İlham Əliyevin rəhbərliyi altında Azərbaycanın başqa bir mühüm üstünlüyü coğrafi mövqeyinin real iqtisadi gücə çevrilməsidir. Şərqlə Qərb, Şimalla Cənub arasında yerləşən Azərbaycan beynəlxalq nəqliyyat və enerji əlaqələrində əhəmiyyətli mövqe qazanıb. Yeni logistika imkanları, enerji layihələri və regional əməkdaşlıq təşəbbüsləri ölkənin iqtisadi çəkisinin artmasına şərait yaradır. Eyni zamanda sənaye, kənd təsərrüfatı, turizm, rəqəmsal texnologiyalar və yaşıl enerji kimi sahələrin inkişafı gələcəyin daha şaxələndirilmiş iqtisadiyyatının qurulmasına yönəlib.
Azərbaycanın inkişaf fəlsəfəsində insanın rifahı da xüsusi əhəmiyyət daşıyır. Müasir məktəblərin tikilməsi, səhiyyə müəssisələrinin yenilənməsi, şəhər və rayonlarda sosial infrastrukturun genişləndirilməsi, məşğulluğun artırılması və həssas sosial qrupların müdafiəsi dövlətin iqtisadi imkanlarının cəmiyyətin rifahına yönəldilməsinin mühüm istiqamətləridir. Güclü dövlətin ən mühüm göstəricilərindən biri onun vətəndaşının sabaha hansı inamla baxmasıdır.
Bu gün Azərbaycan artıq öz tarixinin cavab gözləyən suallarından bir çoxunu arxada qoyub. Qarabağ azaddır, ölkənin suverenliyi təmin olunub, Böyük Qayıdış başlayıb və azad torpaqlarda yeni həyat qurulur. İndi Azərbaycanın qarşısında daha böyük bir vəzifə dayanır: Qələbə ilə qazanılmış siyasi və milli gücü gələcəyin iqtisadi, sosial və elmi tərəqqisinə çevirmək. Prezident İlham Əliyevin rəhbərliyi ilə formalaşan yeni dövrün əsas mənası da budur – öz taleyini özü müəyyənləşdirən Azərbaycan artıq gələcəyinin də tarixini öz iradəsi ilə yazır.