Azərbaycanın son onilliklərdə yaşadığı dəyişikliklərə bütöv şəkildə nəzər saldıqda bir həqiqət xüsusilə diqqət çəkir: dövlətin gücü təsadüfi uğurların deyil, illərlə davam etdirilən məqsədyönlü siyasətin nəticəsidir. Prezident İlham Əliyevin rəhbərliyi dövründə Azərbaycan qarşısına qoyduğu strateji məqsədləri mərhələlərlə həyata keçirərək siyasi iradəsini, iqtisadi imkanlarını və milli potensialını vahid gücə çevirməyə çalışıb. Bu gün ölkənin malik olduğu mövqe məhz dövlət maraqlarının qorunmasını əsas prinsipə çevirən həmin siyasi kursun nəticələri fonunda qiymətləndirilir.
İlham Əliyevin idarəçilik fəlsəfəsində diqqət çəkən əsas məqamlardan biri dövlətin öz imkanlarına arxalanmasıdır. İqtisadi müstəqillik olmadan siyasi müstəqilliyin tam qorunmasının çətin olduğu nəzərə alınaraq Azərbaycanın maliyyə və iqtisadi imkanlarının genişləndirilməsinə xüsusi önəm verilib. Böyük enerji layihələri ilə yanaşı, yeni sənaye müəssisələrinin yaradılması, regionların iqtisadi potensialının hərəkətə gətirilməsi, kənd təsərrüfatının inkişafı, sahibkarlığın təşviqi və nəqliyyat imkanlarının genişləndirilməsi ölkənin iqtisadi dayaqlarının möhkəmləndirilməsinə xidmət edib.
Bu inkişaf insanların gündəlik həyatına toxunan böyük infrastruktur dəyişiklikləri ilə də müşayiət olunub. Azərbaycanın müxtəlif bölgələrində çəkilən yollar, yenilənən enerji və su infrastrukturu, tikilən məktəblər, xəstəxanalar, sosial və mədəniyyət obyektləri şəhər və rayonların simasını dəyişdirib. Dövlət siyasətində regionların inkişafına ayrılan diqqət paytaxtla yanaşı ölkənin bütün ərazilərində iqtisadi fəallığın və həyat keyfiyyətinin yüksəldilməsini qarşıya məqsəd qoyub.
Lakin Prezident İlham Əliyevin siyasi fəaliyyətinin Azərbaycan tarixində ən böyük iz buraxan səhifəsi Qarabağ Zəfəri ilə bağlıdır. Onilliklər boyu xalqımızın qəlbində yaşayan torpaq həsrəti dövlətin qarşısında duran ən mühüm milli məsələ idi. Azərbaycan bu problemin həlli üçün illərlə öz gücünü topladı, ordusunun döyüş qabiliyyətini yüksəltdi və siyasi mövqelərini möhkəmləndirdi. Tarixi məqam yetişəndə Müzəffər Ali Baş Komandan İlham Əliyevin rəhbərliyi altında Azərbaycan Ordusu öz sözünü döyüş meydanında dedi və xalqımızın yaddaşına əbədi həkk olunan şanlı Qələbəyə imza atdı.
Qarabağ Zəfəri Azərbaycan xalqına yalnız torpaqlarını deyil, uzun illər gözlədiyi böyük qürur hissini də qaytardı. Şuşada dalğalanan Azərbaycan bayrağı, azad edilmiş şəhər və kəndlərdə səslənən Azərbaycan dili, doğma yurdlarına ayaq basan keçmiş məcburi köçkünlərin sevinc göz yaşları bu Qələbənin mənəvi böyüklüyünü ifadə edən ən təsirli mənzərələrdir. Sonrakı mərhələdə ölkənin bütün ərazisində suverenliyin təmin edilməsi ilə Azərbaycan tarixində yeni dövlətçilik dövrü başlandı.
Bu tarixi Qələbənin təməlində Azərbaycan əsgərinin qəhrəmanlığı və şəhidlərimizin əvəzs