Azərbaycanın müasir tarixində Prezident İlham Əliyevin adı ölkənin keçdiyi böyük dəyişikliklər, əldə etdiyi mühüm nailiyyətlər və milli məqsədlərin gerçəkləşdirilməsi ilə sıx bağlıdır. Onun prezidentlik fəaliyyəti yalnız ayrı-ayrı sahələrdə görülən işlərlə deyil, Azərbaycanın dövlətçilik tarixində əhəmiyyətli nəticələrin əldə olunduğu bütöv bir dövrlə səciyyələnir. Ölkənin iqtisadi imkanlarının genişlənməsi, müdafiə qüdrətinin artması, beynəlxalq mövqelərinin möhkəmlənməsi və illərlə xalqın ən böyük arzusu olan ərazi bütövlüyünün təmin edilməsi bu dövrün ən mühüm səhifələri sırasında yer alır.
İlham Əliyevin dövlət idarəçiliyində diqqət çəkən əsas xüsusiyyətlərdən biri qarşıya qoyulan məqsədlərin ardıcıllıqla həyata keçirilməsidir. Azərbaycanın gələcəyinə hesablanan böyük layihələr yalnız paytaxtla məhdudlaşmayıb, ölkənin şəhər və rayonlarını da əhatə edib. Yeni avtomobil yollarından elektrik və su təsərrüfatının yenilənməsinə, məktəblərdən xəstəxanalara, sənaye müəssisələrindən sosial obyektlərə qədər geniş quruculuq prosesi ölkənin ümumi mənzərəsini əhəmiyyətli şəkildə dəyişdirib. Regionlara mütəmadi səfərlər və yerlərdə görülən işlərlə tanışlıq da dövlət başçısının bölgələrin inkişafına verdiyi önəmin göstəricilərindən biri olub.
Prezident İlham Əliyevin fəaliyyətinin ən mühüm tarixi nəticələrindən biri Azərbaycanın ərazi bütövlüyünün və suverenliyinin təmin edilməsidir. Uzun illər xalqımızın qəlbində yaşayan Qarabağ həsrətinin sona çatması Azərbaycan tarixində silinməz iz buraxdı. Azərbaycan Ordusunun qazandığı Qələbə, ardınca ölkənin bütün ərazisində suverenliyin bərqərar edilməsi xalqın milli qürurunu daha da yüksəltdi. Prezident, Müzəffər Ali Baş Komandan İlham Əliyevin həmin tarixi günlərdə nümayiş etdirdiyi siyasi iradə və qətiyyət Azərbaycan dövlətçiliyinin ən mühüm səhifələrindən birinə çevrildi.
Qələbədən sonra qarşıda duran böyük vəzifə azad edilmiş torpaqlara həyatın qaytarılması idi. Bu gün Qarabağ və Şərqi Zəngəzurda aparılan quruculuğun miqyası həmin məqsədin necə böyük əzmlə həyata keçirildiyini göstərir. Vaxtilə dağıdılmış şəhər və kəndlərin yerində müasir yaşayış məntəqələri qurulur, yollar çəkilir, tunellər açılır, məktəblər, xəstəxanalar və istehsal müəssisələri yaradılır. Keçmiş məcburi köçkünlərin illər sonra öz doğma yurdlarına qayıtması isə görülən bütün işlərin ən mənalı nəticələrindən biridir. Dünən xarabalıq olan torpaqlarda bu gün Azərbaycan ailələrinin evlərinə işıq yanması Qələbənin quruculuqla davam etdirilməsinin rəmzinə çevrilib.
Dövlət başçısının fəaliyyətində sosial məsələlərə münasibət də mühüm yer tutur. Əhalinin rifahının yüksəldilməsi, həssas sosial qrupların müdafiəsinin gücləndirilməsi, məşğulluğun artırılması və sosial xidmətlərin əlçatanlığının genişləndirilməsi məqsədilə müxtəlif proqramlar həyata keçirilir. İnsanların gündəlik həyatına birbaşa təsir edən problemlərin həlli, şəhər və kəndlərdə yaşayış şəraitinin yaxşılaşdırılması və sosial infrastrukturun yenilənməsi dövlət siyasətinin əsas istiqamətlərindən olaraq qalır.
Şəhidlərimizin əziz xatirəsinə göstərilən ehtiram, onların ailələrinə və qazilərimizə göstərilən diqqət isə xüsusi mənəvi əhəmiyyət daşıyır. Azərbaycanın ərazi bütövlüyü uğrunda canından keçən Vətən övladlarının xatirəsinin yaşadılması dövlət və cəmiyyət qarşısında mühüm mənəvi borc kimi qəbul edilir. Şəhid ailələrinin, qazilərin və müharibə iştirakçılarının sosial təminatının yaxşılaşdırılması, onların mənzil və digər sosial proqramlarla əhatə olunması istiqamətində görülən tədbirlər bu yanaşmanın praktik ifadəsidir. Prezident İlham Əliyevin şəhid ailələri və qazilərlə görüşlərində səsləndirdiyi fikirlər də onların dövlət üçün daşıdığı yüksək mənəvi dəyəri nümayiş etdirir.
Azərbaycanın iqtisadi imkanlarının genişləndirilməsi də ötən illərin mühüm istiqamətlərindən olub. Neft gəlirlərindən ölkənin uzunmüddətli inkişafı üçün istifadə edilməsi ilə yanaşı, qeyri-neft iqtisadiyyatının böyüdülməsi, sahibkarlığın təşviqi, kənd təsərrüfatı, sənaye, logistika, turizm və rəqəmsal texnologiyalar kimi sahələrin inkişafı istiqamətində addımlar atılıb. Yeni istehsal sahələrinin yaradılması və Azərbaycanın beynəlxalq nəqliyyat marşrutlarında rolunun artması ölkənin iqtisadi imkanlarını daha geniş coğrafiyaya çıxarmağa xidmət edir.
Prezident İlham Əliyevin xarici siyasətində Azərbaycanın söz sahibi olan, öz milli maraqlarını açıq şəkildə müdafiə edən dövlət kimi mövqeyinin qorunması mühüm yer tutur. Bakı dünyanın müxtəlif siyasi və iqtisadi mərkəzləri ilə əməkdaşlıq əlaqələri qurmaqla yanaşı, bir sıra beynəlxalq təşəbbüslərin və böyük tədbirlərin keçirildiyi mühüm məkana çevrilib. Enerji layihələri, nəqliyyat dəhlizləri və regional əməkdaşlıq təşəbbüsləri Azərbaycanın əhəmiyyətini artıraraq ölkənin Avropa ilə Asiya arasında mühüm tərəfdaşlardan biri kimi mövqeyini möhkəmləndirib.
İlham Əliyevin prezidentliyi dövrünün ən diqqətçəkən xüsusiyyətlərindən biri də milli məqsədlərlə quruculuq fəaliyyətinin paralel aparılmasıdır. Bir tərəfdən Azərbaycanın təhlükəsizliyi və dövlət maraqları qorunur, digər tərəfdən şəhərlər yenilənir, rayonlarda yeni imkanlar yaradılır, azad edilmiş torpaqlarda yaşayış bərpa olunur. Bütün bunların mərkəzində isə Azərbaycan vətəndaşının daha təhlükəsiz, firavan və sabit ölkədə yaşaması məqsədi dayanır.
Bu gün Azərbaycan öz tarixinin qürur doğuran səhifələrini yaşayarkən qarşıda daha böyük məqsədlər dayanır. Qarabağa qayıdan insanların sevincindən yeni qurulan şəhərlərə, ölkənin beynəlxalq mövqeyindən iqtisadi imkanlarının genişlənməsinə qədər müşahidə olunan dəyişikliklər uzun illər ərzində görülmüş işlərin nəticəsini əks etdirir. Prezident İlham Əliyevin adı isə bu dövrdə Azərbaycanın qazandığı tarixi Zəfər, bərpa etdiyi suverenlik, həyata keçirdiyi böyük quruculuq və gələcəyə hesablanan dövlət siyasəti ilə birlikdə müasir Azərbaycan tarixinin mühüm səhifələrində yer alır.