Xırdalanda qanunsuz qazıntı işləri ciddi narazılıq yaradır: Sakinlər evlərində rahat yaşaya bilmirlər – VİDEO
Gündəm / Hadisə

Bakı şəhərinin yaxınlığında yerləşən Abşeron rayonunun Xırdalan şəhərində aparılan tikinti və qazıntı işləri ilə bağlı sakinlərin narazılıqları səngimək bilmir. Şəhərsalma qaydalarının qorunması, ətraf mühitin mühafizəsi və vətəndaşların rahat yaşayış hüququ ilə bağlı sualların gündəmə gəldiyi bir vaxtda növbəti şikayət İsi Məlikzadə küçəsi, 78 ünvanından daxil olub.
Nyus.Az redaksiyasına müraciət edən sakinlərin sözlərinə görə, bir müddətdir yaşadıqları ərazinin yaxınlığında aparılan qazıntı və söküntü işləri onların gündəlik həyatını ciddi şəkildə çətinləşdirib. Sakinlər bildirirlər ki, gecə-gündüz davam edən ağır texnikanın səs-küyü səbəbindən evlərində rahat otura bilmir, yolların texnika tərəfindən bağlanması ucbatından isə evlərinə daxil olmaqda və ərazidən çıxmaqda çətinlik çəkirlər.
Narazı sakinlərin iddiasına görə, ağır texnikanın intensiv hərəkəti nəticəsində məhəllədaxili yollar da yararsız vəziyyətə düşüb. Lakin onların sözlərinə görə, yaranmış problemlərin aradan qaldırılması istiqamətində indiyədək ciddi tədbir görülməyib.
Məsələnin daha narahatedici tərəfi isə qazıntı işləri zamanı ərazidəki ağacların kəsilməsi ilə bağlıdır.
Sakinlər iddia edirlər ki, çoxsaylı ağaclar məhv edilib, bəziləri isə gecə saatlarında kökündən çıxarılıb. Əgər bu iddialar təsdiqini taparsa, ortaya təkcə şəhərsalma qaydalarının deyil, həm də yaşıllıqların mühafizəsi ilə bağlı tələblərin pozulması məsələsi çıxır.
Sakinlərin sözlərinə görə, qazıntı işləri zamanı yaranan vibrasiya yaxınlıqdakı yaşayış evlərində də hiss olunur. Onlar evlərin divarlarında çatların yaranmasından ehtiyat etdiklərini, hər gün narahatlıq və qorxu içində yaşadıqlarını bildirirlər.
Bəs sakinlərin müraciətlərinə kim cavab verməlidir?
Vətəndaşlar bildirirlər ki, Abşeron Rayon İcra Hakimiyyətinə dəfələrlə müraciət etsələr də, şikayətlərinə konkret münasibət bildirilməyib. Onların sözlərinə görə, rayon icra hakimiyyətinin başçısı Abdin Fərzəliyevin qəbuluna düşmək də müşkül məsələyə çevrilib. Sakinlər hesab edirlər ki, vətəndaşların problemlərini dinləməli olan qurumla əlaqə saxlamaq belə çətinləşib.
Müraciət edən şəxslər Rayon Memarlıq İdarəsinə dəfələrlə üz tutduqlarını, lakin hər dəfə məsul şəxslərin yerində olmadığını və tədbirdə olduqlarını eşitdiklərini iddia edirlər. Qazıntı işlərini aparan şəxslərin isə sakinlərə «Memarlıq icazə verib» cavabını verdikləri bildirilir.
Daha ciddi iddialardan biri də işləri həyata keçirən şəxslərin sakinlərə təzyiq göstərməsi və onları hədələməsidir. Bu iddialar da aidiyyəti qurumlar tərəfindən araşdırılmalı, hər hansı qanun pozuntusu aşkar edilərsə, müvafiq tədbirlər görülməlidir.
Məktəbin yaxınlığında tikinti: Uşaqların təhlükəsizliyi necə təmin olunur?
Diqqətçəkən məqamlardan biri də qazıntı və tikinti işlərinin Xırdalan şəhərində yerləşən 11 nömrəli tam orta məktəbin bilavasitə yaxınlığında aparılmasıdır. Sakinlərin sözlərinə görə, ağır texnikanın hərəkəti və yolların bağlanması məktəblilərin gündəlik gediş-gəlişinə də maneələr yaradır.
Onlar ərazidə çoxmərtəbəli yaşayış binasının inşa edilməsinin planlaşdırıldığını bildirirlər. Onsuz da dar olan küçədə yeni çoxmərtəbəli binanın tikilməsi isə mövcud yol infrastrukturuna əlavə yük yaradacağı ilə bağlı ciddi narahatlıq doğurur.
Sakinlər haqlı olaraq sual edirlər: onsuz da hərəkət üçün kifayət qədər şəraiti olmayan bir ərazidə yeni çoxmərtəbəli binanın tikintisinə hansı əsaslarla şərait yaradılır? Ərazinin yol infrastrukturu, yaşıllıq sahələri, məktəblilərin təhlükəsizliyi və mövcud yaşayış binalarının texniki vəziyyəti nəzərə alınıbmı?
Ölkə rəhbərliyi tərəfindən dəfələrlə şəhərsalma qaydalarına riayət olunması, qanunsuz tikintilərin qarşısının alınması və vətəndaşların müraciətlərinə həssas yanaşılması ilə bağlı tapşırıqlar verildiyi halda, Xırdalanda səsləndirilən bu şikayətlər nə üçün hələ də həllini tapmır?
Görəsən, Xırdalanda şəhərsalma qaydalarına nəzarət edən qurumlar hansı mövqedədir? Ağır texnikanın yaratdığı fəsadlara, yaşıllıqların məhv edilməsi ilə bağlı iddialara və sakinlərin təhlükəsizlik narahatlığına kim cavabdehdir?
Nyus.Az olaraq hesab edirik ki, məsələ aidiyyəti dövlət qurumları tərəfindən təxirəsalınmadan araşdırılmalı, qazıntı və tikinti işlərinin qanuniliyinə, müvafiq icazə və layihə sənədlərinin mövcudluğuna, eləcə də ətrafdakı yaşayış evlərinin və məktəbin təhlükəsizliyinə hüquqi qiymət verilməlidir.
Qeyd edək ki, məsələ ilə bağlı Abşeron Rayon İcra Hakimiyyətinin mövqeyini öyrənmək mümkün olmayıb. Qarşı tərəfin də mövqeyini dərc etməyə hazırıq.
Nyus.Az
Ctrl
Enter
Mətndə səhv var?
Mətni seçin və Ctrl+Enterdüyməsini sıxınDigər xəbərlər:
Münasib Qurbanov: İlham Əliyev – Milli Ləyaqəti Ucaldan, Azərbaycanın Tarixi Qürurunu Dünyaya Nümayiş Etdirən Prezident
Əfqan Xudaverdiyev: İlham Əliyev – Azərbaycanın Gücünü, Qürurunu və Gələcəyini Birləşdirən Tarixi Şəxsiyyət
Cəmaləddin Rüstəmov – Notarius peşəsinin dəqiqlik və etimad məsuliyyəti
Günay Ağamalı – İnsan duyğusundan ictimai məsuliyyətə uzanan fəaliyyət yolu
Niyazi Nəcəfov – Təhsil işçilərinin həmrəyliyinə xidmət edən ictimai məsuliyyət
Həmçinin oxuyun:
Eldar Əzizov: “Milli Qurtuluş Günü: Zəfər yolunun başlanğıcı”
Eldar Quliyev: “Heydər Əliyev İli başa çatsa da, Azərbaycanda Heydər Əliyev epoxası əsrlər boyu davam edəcək”
İslam İsmayılov : Zəfər zirvəsinə yüksələn qəhrəmanlar
Qayğıya ehtiyacı və Əlilliyi olan Şəxslərə Dəstək" İctimai Birliyin təşəbbüsü ilə "Unutmadıq, unutmarıq" adlı tədbir keçirilib
Azərbaycan Orta Dəhliz layihəsində söz sahibidir.
